Шағирә Йомабикә Ильясоваға - 55 йәш
Бөгөн киң билдәле шағирә, Башҡортостан Республикаһының атҡаҙанған матбуғат һәм киң мәғлүмәт хәҙмәткәре, ”Башҡортостан ҡыҙы” журналының баш мөхәррире, БР Дәүләт Йыйылышы – Ҡоролтай депутаты Йомабикә Ильясова үҙенең күркәм юбилейын - 55 йәшен билдәләй.
Ильясова Йомабикә Сәләхетдин ҡыҙы 1957 йылда Хәйбулла районы Аҡъюл ауылында тыуған. 1974 йылда Өфөләге 1-се һанлы мәктәп-интернатҡа уҡырға килә. Башҡорт дәүләт университетын тамалай.
Йомабикә Сәләхетдин ҡыҙы үҙ халҡының яҙмышы өсөн янып, борсолоп йәшәгән, оло хөрмәткә лайыҡ, абруйлы гүзәл заттарыбыҙҙың береһе, күп яҡлы талант эйәһе.Ул тиҫтәгә яҡын шиғри йыйынтыҡ авторы, юғары мәҙәниәтле етәксе, бай телле журналист, әүҙем йәмәғәт эшмәкәре булараҡ танылыу яуланы. Ҡоролтай депутаты итеп һайланыуы ла уның ижади һәм сәйәси эшмәкәрлегенә оло баһа, мәртәбә өҫтәй.
