Ошо көндәрҙә күренекле башҡорт шағирәһе Фәүзиә Абдулла ҡыҙы Рәхимғолованың тыуыуына 90 йыл тулды. Ул Башҡортостандың Ишембай районы Йәнырыҫ ауылында 1921 йылдың 15 декабрендә тыуған. Бәләкәйҙән үк етемлектең әсе һурпаһын татып үҫә. Һуғыш йылдарында заводта эшләй, тыныс тормошта иһә мәктәптә уҡыта, һуңынан ғүмеренең күп өлөшөн матбуғатҡа арнай, «Пионер» (хәҙерге «Аманат» журналындында), «Башҡортостан ҡыҙы» журналдарында эшләй.
Фәүзиә Рәхимғолова – әҙәбиәтебеҙҙә күренекле урын алып торған яҙыусыларҙың береһе, шиғырҙарҙан һәм проза әҫәр¬ҙәренән торған 26 китап авторы. Әҙибәнең барлыҡ ижады йәш быуынды тәрбиәләүгә бағышланған. Ул үҙен ысын мәғәнәһендә талантлы балалар яҙыусыһы итеп танытты. Әлеге көндә лә шағирәнең шиғырҙары, инсценировкалары – күңел нурҙары дәреслектәрҙән төшмәй, байрам иртәлектәрен биҙәй. Ул уҡытыусы булараҡ бала психологияһын, күңел нескәлектәрен аса белде. Кескәй уҡыусыға нотоҡ уҡыманы, ә уны уйланырға, кәрәк саҡта «донъяһын онотоп» шаярырға өндәне.
Ололар өсөн ижад иткән лирик шиғырҙары үҙе кеүек тәрән хисле, тулы һыулы, тыныс, үҙ бәҫен белеп аҡҡан йылғаларға оҡшаш.
Башҡорт әҙәбиәтен үҫтереүгә ҙур өлөш индергәне өсөн ул «Башҡортостан Республикаһының атҡаҙанған мәҙәниәт хеҙмәткәре» тигән маҡтаулы исемгә лайыҡ булды.
Фәүзиә Рәхимғолованың әҫәрҙәрендә әле бер генә быуын тәрбиәләнмәҫ, сөнки улар баланы шәхес итеүҙә көслө ярҙамсы булып тора.
«Башҡортостандың мәҙәни донъяһы» порталы