Билдәле булыуынса, борон-борондан халҡыбыҙҙа ата-бабалар тәрбиәһе ныҡлы урын алған. Улар тураһында айырым әсбаптар яҙылмаһа ла, тормош һабағы биреүсе тәрбиә мәктәбенең халыҡ аңына тәҫъире көслө, ул быуаттар буйы һаҡланып килгән. Һәр кеше ата-бабаларының тарихы нигеҙенә таянып, улар әйтеп ҡалдырғанды хөрмәт итеп, заты-ырыуы менән ғорурлыҡ тойғоһо кисереп ғүмер иткән.
Шәжәрә ағасында яҙылған тамырҙарҙы өйрәнеү был донъяның асылын аңлап, уны еңелерәк ҡабул итергә ярҙам иткән. Был юлдан  тайпылыу, ата-бабалар тарихы өсөнө яуаплылыҡ тойғоһон юғалтыу ҡолға, олтанға, сит-яттарҙың ҡолона әйләнеүгә тиң булған. Быуаттар дауамында шулай йәшәгән халҡыбыҙ.

Төбәктәрҙә “Шәжәрә байрам”дарын үткәреү бөгөнгө көндә бигерәк тә урынлы, сөнки, ул  байрам сараһы булыуҙан бигерәк, ябай халыҡҡа үҙ тамырҙарын табыу, барлау, нығытыу өсөн файҙалы.

2015 йылдың 23 октябрендә Көйөргәҙе районының Ермолаево ҡасабаһында Бөйөк Ватан һуғышында еңеүҙең 70 йыллығына арналған “Шәжәрә байрамы” Республика халыҡ байрамы көтөлә.

Был байрамды БР Мәҙәниәт министрлығы, Республика халыҡ ижады үҙәге, БР Көйөргәҙе миниципаль районы хакимиәте ойоштора.

Унда Советтар Союзы геройы Александр Матросовтың (Шәкирйән Мөхәмәтйәновтың ) шәжәрәһе презентацияһы тәҡдим ителәсәк.
Яуҙа ятып ҡалған яугирҙәр рухына бағышланған саранан ситтә ҡалмағыҙ.