Күренекле йәмәғәт эшмәкәре, яҙыусы Рамаҙан Өмөтбаев исемен йөрөткән башҡорт лицейында 1-се төбәк-ара ижади конкурс үтте. Шәхестең тыуыуына 90 йыл тулыуға арналған сарала ҡатнашыусылар шиғыр, проза, публицистик эҙләнеүҙәрҙән торған сығыштар тәҡдим итте.

Башҡортостандың күренекле дәүләт һәм йәмәғәт эшмәкәре, яҙыусы һәм публицист Рамаҙан Ғимран улы Өмөтбаевтың тыуыуына быйыл 90 йыл. Шәхестең исемен йөрөткән башҡорт лицейында иҫтәлекле датаға арнап бик күп саралар үткәрелә. Улар араһында «Өмөтбаев уҡыуҙары» ғилми-ғәмәли конференция айырым иғтибарға лайыҡ. Беренсе тапҡыр үткәрелгән ижади бәйге Сибай ҡалаһынан тыш, Урал аръяғы райондары вәкилдәрен дә йәлеп итте.

Сараға башҡорт теле һәм әҙәбиәте уҡытыусылары, мәғариф бүлеге белгестәре, Рамаҙан Өмөтбаевтың яҡын туғандары ла саҡырылғайны. Уларҙың һәр береһе шағир хаҡында яҡты хәтирәләргә бирелде. «Өмөтбаев уҡыуҙары» алты секцияла барҙы. Уларҙа илленән ашыу ҡатнашыусы сығыш яһаны. Тәүгеһендә мәктәп уҡыусылары арҙаҡлы шәхестең ижадын һәм тормош юлын сағылдырған ғилми эҙләнеүҙәрен тәҡдим итте. Икенсе төркөмдә йәш ҡәләм оҫталары йыйылды.

Күренекле дәүләт һәм йәмәғәт эшмәкәре, яҙыусының ижадына һөйөү уятыу, уны һаҡлауға йүнәлтелгән сара артабан да дауам итәсәк, тигән өмөттә ойоштороусылар. Өмөтбаев уҡыуҙары быны тағы бер раҫланы.