2012 йылдың сентябренән Силәбе ҡалаһында «Афарин» исемле башҡорт балалар ижад үҙәге эшләй башлаясаҡ. БР атҡаҙанған мәҙәниәт хеҙмәткәре Майтап Вәлитованың бындай ижад үҙәген булдырыу кәрәклеге тураһында идеяһын урындағы, Силәбе башҡорттары ҡоролтайы эләктереп ала.
Әйткәндәй, Силәбе ҡалаһы хакимиәтенең Мәҙәниәт идаралығы ла хуплап ҡабул итә. Бөгөндән билдәле булыуынса, «Афарин» Силәбе ҡалаһының Тракторозаводск районының «Кировец» кинотеатры бинаһында урынлашасаҡ.
Асылырға торған балалар ижад үҙәгенә 6-12 йәштәге башҡорт балалары ҡабул ителәск. Уҡытыу программаһы өс йылға ҡаралған һәм уның барышында балалар башҡорт мәҙәниәтен төрлө яҡлап өйрәнәсәк: халыҡ хореографияһы һәм вокалынан башлап сәхнә телмәре, фольклор, милли йолалар һәм туған телдә камил аралаша белеүгә тиклем. Башланғыс ваҡытта үҙәккә йөрөү түләүле буласаҡ.
«Афарин» үҙәгенең етәксеһе Майтап Вәлитова әйтеүенсә, барлыҡ балалар тәүге осорҙа бәләкәстәр һәм өлкәнерәк балалар өсөн ҡаралған дөйөм программа буйынса белем аласаҡ. Уҡытыуҙың икенсе йылында иһә улар концерт эшмәкәрлегенә йәлеп ителәсәк, өсөнсө йылда иһә улар ысын белгес буласаҡ.
Әлеге ваҡытта кинотеатр бинаһында ремонт эштәре ҡайнай. Июль аҙағына тиклем бер үк ваҡытта йөҙ бала шөғөлләнмәле кабинеттар әҙер буласаҡ. Әйткәндәй, ишектәрен асырға торған үҙәк өсөн талантлы педагогтар табылған да инде. Реклама кампанияһы ла әүҙем бара.
Силәбе ҡалаһының «Башҡорттар ҡоролтайы» ойошмаһы рәйесе Радик Бакиев фекеренсә, балалар ижад үҙәге халыҡта ҡыҙыҡһыныу менән файҙаланасаҡ, тап башҡорт мәҙәниәтен төрлө яҡлап өйрәнеү мөмкинлеген биргәне өсөн, ти ул. Ғөмүмән, үҙәккә бөгөндән егермеләп кеше яҙылған.
Әгәр һеҙ ҙә Силәбелә йәшәйһегеҙ икән, балағыҙҙы «Афарин» башҡорт балалар ижад үҙәгенә йөрөтөргә теләгегеҙ бар икән – щылтыратығыҙ. Белешмәләр өсөн Силәбелә телефондар: 722-77-20, 8-908-579-47-33, 8-951-468-10-99. Сығанаҡ: «Шоңҡар» журналы