Силәбе өлкәһендә «Шәжәрә» журналы, «Әрғужа», «Аҡ тирмә», «Башҡорт74.РФ» гәзиттәре сыға башланы. Был баҫмалар ошо төбәктә йәшәгән милләтәштәребеҙ көнкүрешен хәбәр итә.

«Әрғужа» район гәзитенә ҡушымта булып айына бер тапҡыр сығасаҡ. Әйтеп китергә кәрәк, был баҫма элек сыҡҡан һәм уның эшмәкәрлеге туҡтатылған ине, әле ул тергеҙелде. Гәзит Ҡоролтай, милли мәҙәни ойошмалар, башҡорт теле һәм әҙәбиәте уҡытыусыларының эшмәкәрлеген сағылдырасаҡ.

«Аҡ тирмә» һәм «Шәжәрә»нең ойоштороусыһы башҡорт йәмәғәт ойошмаһы «Аҡ тирмә»нең төбәк бүлексәһе. «Аҡ тирмә» ошо ойошма тарафынан башҡарылған эштәр хаҡында бәйән итәсәк, журнал һәр номерында айырым ғаиләләрҙең шәжәрәһе менән таныштырасаҡ. Гәзит айына бер, ә журнал өс айға бер тапҡыр сығасаҡ.

«Башҡорт74.РФ» гәзитенең ойоштороусыһы журналист Резеда Байназарова. Айына ике тапҡыр сығасаҡ гәзит Силәбе өлкәһендә үткән һәм үтәсәк бөтә мәҙәни яңылыҡтарҙы, байрамдарҙы хәбәр итәсәк.

Был һөйөнөслө яңылыҡҡа ысын күңелдән шатланабыҙ һәм милли баҫмаларға оҙон-оҙаҡ йылдар милләтәштәребеҙгә терәк булып, телебеҙҙе, рухыбыҙҙы һаҡларға тос өлөш индереп уңышлы эшләүҙәрен теләйбеҙ.