Краснокама районында Славян яҙмаһы һәм мәҙәниәте көндәре сиктәрендә Никола Вешний фольклор байрамы үтте.

1997 йылдан бирле ойошторолоп килгән сарала быйыл Башҡортостандың төрлө төбәктәренән, Татарстан, Удмурт республикаларынан, Пермь крайынан 30-ҙан ашыу фольклор коллективы ҡатнашты.

Краснокамала Славян яҙмаһы һәм мәҙәниәте көндәренә арналған саралар 15 йыл тирәһе үтә. Быйыл байрамдың даирәһе тағы ла киңәйгән: Татарстан, Удмурт республикаларынан, Пермь крайынан фольклор коллективтары ҡатнаша.

Славян яҙмаһы һәм мәҙәниәте көндәре сиктәрендә ойошторолған Никола Вешний байрамының тап Краснокама ерлегендә үтеүе тәбиғи. Сөнки Николо-Березовка ауылында рустарҙың тарихи-мәҙәни үҙәге урынлашҡан һәм тап ошонда боронғо Николай ғибәҙәтханаһы һәм XX быуаттағы архитектура ҡомартҡылары һаҡланып ҡалған.

Байрамда ҡатнашыусыларҙы тәбрикләргә Башҡортостан Президенты ла килде. Рөстәм Хәмитов республикала йәшәүсе төрлө милләт халыҡтарының йолаларын, ғөрөф-ғәҙәттәрен сағылдырған тирмәләрҙе ҡарап сыҡты, халыҡ менән аралашты.

Ошонда уҡ оҫталар ҡул эштәренән аллея әҙерләгән. Бында уйынсыҡтарҙан алып көнкүреш әйберҙәренә тиклем бар кәрәк-яраҡты күрергә мөмкин. Айырыуса үрелгән сабата, сигелгән иконалар һоҡланыу уята.

Байрам сиктәрендә тетрлаштырылған тамаша ла күрһәтелде. Рөстәм Хәмитов әйтеүенсә, халыҡтың үҙ тарихына, мәҙәниәтенә иғтибарлы мөнәсәбәте ихтирамға лайыҡ. Тап ошондай фестивалдәр быуындар күсәгилешлеген һаҡларға ярҙам итә. Республика етәксеһе урындағы тарихи Николай ғибәҙәтханаһын ҡарап сыҡты. Әле изге йортта төҙөкләндереү бара. Рөстәм Хәмитов, мөмкинлек килеп сыҡһа, ярҙам күрһәтәсәктәрен белдерҙе. Президент Краснокамаға эш сәфәре сиктәрендә «Ҡарағайлыҡ» шифахана-профилакторийына ла инеп сыҡты. Бында 200 милллион һумға ремонт яһалған, ҡоролмалар һатып алынған. Рөстәм Хәмитов төҙөүселәрҙен эшен юғары баһаланы. Тәүге ял итеүселәрҙе июнь башында көтәләр. Көҙгә йәнә бер корпуста ремонт башлана.

Икмәк булһа, йыр ҙа була тигән кеүек, краснокамалар тырышып эшләй ҙә, күңелле итеп ял итә лә белә. Эш сәфәре ошо тормош ысынбарлығын тағы ла бер тапҡыр иҫбатланы.

Сығанаҡ: Башҡортостан юлдаш телевидениеһы