10-12 октябрь Мәжит Ғафури исемендәге Башҡорт дәүләт академия драма театры сәхнәһендә Стәрлетамаҡ дәүләт театр-концерт берләшмәһенең гастролдәре уҙасаҡ. Өфө халҡы иғтибарына 3 спектакль тәҡдим ителәсәк, уларҙың икәүһе премьера!

10 октябрь Баязит Бикбайҙың «Ҡоҙаса» музыкаль комедияһы уйналасаҡ. Үлемһеҙ спектаклдә төп ролдәрҙә Башҡортостандың халыҡ артистары Рауил Ғәлин, Фиҙәлиә Рәхимова, Башҡортостандың атҡаҙанған артисы Илһам Рәхимов, шулай уҡ Резеда Әмәкәсева, Илфир Баймырҙин, Гилүс Минһажев.

11 октябрь Туфан Миңнуллиндың «Ай булмаһа, йондоҙ бар...» драмаһының премьераһы үтәсәк. Төп героиняның иңенә тормош йырып сыҡҡыһыҙ ауырлыҡтар һала: иренең хыянаты, әсәһенең ҡаты сирҙән һуң үлеүе, туғандарының битарафлығы һәм иң ауыры – берҙән-бер ҡыҙының үлеме... Ҡатын был ауыр һынауҙарҙы үтергә кәрәклеген һәм һынырға ярамғанлығын бар күңеле менән төшөнә. Нисек кенә булмаһын, әммә ул һаман да бәхет йондоҙоноң ҡабынырына бар йөрәге менән ышана. Спектаклдә төп ролде театрҙың йондоҙо Резеда Әмәкәсева уйнай.

12 октябрь Башҡортостан Республикаһы Президенты Грантына лайыҡ булған Альбер Камю пьесаһы буйынса «Калигула» спектакленең премьераһы сәхнәләштереләсәк. Трагедияла төп ролдә Вадим Ҡылысов, шулай уҡ Фәнил Толонғужин, Марат Зөбәйеров һәм Рафиҡ Хәсәновтар ҡатнашасаҡ. Тарихта иң ҡанһыҙ булып урын алған Рим императорының характерын асырға тырышасаҡ йәш артистар.