Театр 4–10 апрель Өфөлә үтәсәк «Театр яҙына» әҙерләнә. Тамашасы хөкөмөнә Н.Ғәйетбай пьесаһы буйынса ҡуйылған «Урал батыр» драмаһын сығарыласаҡ.

«Урал батыр» эпосы халҡыбыҙ тыуҙырған, уның рухи ҡиммәттәрен сағылдырған бөйөк әҫәрҙәрҙең береһе, унда мәңгелек темалар – изгелек һәм яуызлыҡ, мөхәббәт, әҙәп һәм намыҫ, ата менән ул мөнәсәбәттәре, йәшәү һәм үлем – ята.

Спектакль баштан уҡ тамашасы иғтибарын йәлеп итә һәм аҙаҡҡаса уны тота. Эпостағыса Шүлгән менән Урал бер үк маҡсатҡа төрлө юлдар менән баралар: Урал халыҡты яуызлыҡтан, ҡоллоҡтан ҡотҡарыу һәм ирекле итеү кеүек изге, әммә көрәш талап иткән, аҙым һайын үлем һағалап торған ҡурҡыныс юлдан китһә, Шүлгән еңел юл һайлай, алдаҡ, намыҫһыҙлыҡ юлы аша мәңгелек йәшәү сығанағын ҡулға төшөрөү. Изгелек яуызлыҡты барыбер еңә, Урал батыр йәшәү сығанағы изге һыуҙы таба һәм уны бар тереклек йәшәһен өсөн саф тамсыларҙы тәбиғәткә һибә. Үҙе үлһә лә, ул ҡылған батырлыҡ мәңгелек.