«Тамыр», телеканалы ойошторған «Сулпылар», республика телевизион конкурсы Рәсәй, Халыҡ-ара кимәлдә лә киң танылған бәйгеләрҙең береһе. Конкурста ҡатнашыу - һәр баланың теләге тип әйтһәк тә хата булмаҫ. Күптән түгел телеүҙәк шат балалар тауышына күмелде. Быйылғы «Сулпылар»ға йомғаҡ яһап, Яңы йыл сығарылышы төшөрөлдө «Сулпылар» конкурсы 1992 йылдан уҙғарыла. Унда йөҙләгән бәләкәс үҙ көсөн һынап ҡараны, йыр-моңға маһирлығын күрһәтте. Быйыл тапшырыуҙы эшләүсе ижади төркөм бик күп ҡыҙҙарға һәм малайҙарға һәләтен күрһәтеү мөмкинлеге бирҙе. Яҙҙан башлап республиканың төрлө төбәктәренән талантлы балаларҙы эҙләне. Салауат районының Малаяҙ ауылында, Нефтекама, Сибай, Өфө ҡалаларында һайлап алыу турҙары ойошторолдо. Жюри ағзалары барлығы 250-ҙән ашыу сығышты баһаланы. Һөҙөмтәлә, 24 ҡыҙ һәм малай икенсе турға үтеп, Өфөгә килеп студияла йырлау бәхетенә иреште. Ә финалға ни бары ун ике бала сыҡты. Уларҙың матур йырҙарына клиптар төшөрөлдө. «Сулпылар»ҙың Яңы йыл сығарылышын 31 декабрҙә сәғәт биштә ҡарарға мөмкин. Унда һеҙ йәш таланттарҙың матур йырҙарын ишетерһегеҙ. Гала-концертта иң моңло һәм дәртле йырсылар сығыш яһаясаҡ.
 Ғәлиә Алсынова.