18 октябрҙә Свердловск өлкәһе Екатеринбург ҡалаһында ҙур сара үтте. Урындағы башҡорт йәмәғәтселеге үҙ көсө менән башҡорт теленә арналған Халыҡ-ара ғилми-практик конференция уҙғарҙы. Конференцияла башҡорт теленең килеп сығышы, уның үҫеше һәм бөгөнгөһө, киләсәге хаҡында докладтар яңғыраны. Уны Свердловск өлкәһе Екатеринбург ҡалаһындағы башҡорт үҙәге, “Уралым” башҡорт йәштәре берлеге ойошторҙо. Әйткәндәй, урындағы башҡорт йәмәғәтселеге, үҙәктән айырым йәшәүенә ҡарамаҫтан, әүҙемлеге, алдынғылыҡҡа ынтылыуы, эшенең яҡшы һөҙөмтәләре менән ҡыуандыра. Сараға килгәндә, РФ атҡаҙанған мәҙәниәт эшмәкәре Сыскова Людмила Петровна конференцияның юғары кимәлен телгә алып үтте. Бындай конференция алдағы йылдарҙа булып торасаҡ.