Сәхнәлә бөйөк «Һаран»!
21 март Мәжит Ғафури исемендәге Башҡорт дәүләт академия драма театры сәхнәһендә йәнә премьера - бөйөк драматург Жан Батист Мольерҙың "Һаран" ("Скупой") комедияһы сәхнәләштереләсәк.
«Аҡса - аҡсаҡайҙарым,
Бахыр түғанҡайҙарым.
Алтын-алтынҡайҙарым,
Иң ҡәҙерле дуҫтарым!», -
донъяла аҡсаларынан башҡа бер ни ҙә күрмәгән, берсә йәлләткес, берсә көлдөргөс һаран Гарпагон (Башҡортостандың һәм Рәсәйҙең халыҡ артисы, С.Юлаев исемендәге дәүләт премияһы лауреаты Хөрмәтулла Үтәшев) шулай һамаҡлай... Күҙенә бурҙар күренә һәм ул «Ҡайһы яҡҡа йүгерергә? Әллә йүгермәҫкә микән?»,- тип гел икеләнә...
Спектаклде сәхнәгә ҡуйыусы режиссер – Искәндәр Саҡаев. Рәссамы – Башҡортостандың атҡаҙанған сәнғәт эшмәкәре Альберт Нестеров. Пьесаны рус теленән башҡортсаға ауҙарыусы – Хөрмәтулла Үтәшев.
«Һаран» комедияһында Башҡортостандың халыҡ, Рәсәйҙең атҡаҙанған артисы Илдар Сәйетов, Эмиль Әмиров Милена Сираева, Зилиә Ситдиҡова, Руслан Хайсаров, Лилиә Ғәлина, Ирада Фазлаева,, Айһылыу Йомағолова, Руслан Ғәлимов, Юнир Ҡоланбаев, Фәнис Рәхмәтов, Урал Әминов, Айнур Ситдиҡов ҡатнаша. Бөгөнгө көнгә ауаздаш, ҡуйылышы менән заманса, бай йөкмәткеле классик комедия 95-се юбилей миҙгеленең тағы бер мөһим ваҡиғаһына әйләнеп, тамашасыға күркәм бүләк булмаҡсы.
