Өфөлә, Республика халыҡ ижады үҙәгендә барлыҡҡа килгән сәсәндәр үҙәге эше әүҙемләшә. Ошо көндәрҙә уның ағзалары әйтеш буйынса оҫталыҡ дәрестәре үткәрергә йыйына. Сәсәндәр үҙәге етәксеһе Нәфисә Тулыбаева әйтеүенсә, ваҡытында онотолоп ҡалған һүҙ оҫталығы сәнғәтен тергеҙеү эштәре әүҙем алып барыла. Һүҙ оҫталығы менән бәйле йолаларҙы үҫтереү өсөн Рәсәй төбәктәренә экспедициялар ойоштороу, тәжрибә уртаҡлашыу, уртаҡ сараларҙа ҡатнашыу ҡаралған. Был маҡсаттарҙы тормошҡа ашырыуҙы үҙ өҫтөнә үҙәк етәксеһе урынбаҫары Гөлгөнә Баймырҙина, танылған йәмәғәт эшмәкәрҙәре Мәрйәм Бураҡаева һәм Рәйсә Күзбәкова алған. Билдәле сәсәндәрҙең исемен тергеҙеү, улар рухына бағышланған саралар уҙғарыу, сәсәнлек оҫталығына эйә өлкән быуын вәкилдәрен танытыу эше лә планлаштырыла. .