Күптән түгел Төркиәлә күренекле башҡорт яҙыусыһы, Салауат Юлаев исемендәге дәүләт премияһы лауреаты Динис Бүләковтың ике китабы донъя күрҙе. Баҫмалар Анҡара ҡалаһының Этимесгут районы хакимиәте һәм «Бенгю» Евразия Яҙыусылар союзы менән берлектә ТӨРКСОЙ халыҡ-ара төрки мәҙәниәте ойошмаһы тарафынан нәшер ителә. 10 декабрьҙә баш ҡалабыҙҙа, Фәйзи Ғәскәров исемендәге дәүләт академия халыҡ бейеүҙәре ансамбленең тамашалар залында романдарҙың исем туйы уҙғарылды. Сарала мәртәбәле ҡунаҡтар – республикабыҙҙың халыҡ-ара ТӨРКСОЙ төрки мәҙәниәте ойошмаһындағы вәкиле Әхәт Сәлихов, Төркиәнең Ғази университеты уҡытыусыһы, филология фәндәре докторы, романдарҙы төрөк теленә тәржемә итеүсе Нигяр Ҡалҡан һәм Анҡара ҡалаһының Этимесгут районы хакимиәте вәкиле Аладдин Санат ҡатнашты. Ғалимә Нигяр Ҡалҡан аспирантурала уҡығанда тәүҙә яҡут телен өйрәнә, ә докторлыҡ диссертацияһы өсөн башҡорт телен һайлай һәм Динис Бүләков ижадына туҡтала. Ул яҙыусының «Ғүмер бер генә» һәм «Килмешәк» романдарының стилистикаһын, семантикаһын тикшереү менән бергә уларҙы төрөк теленә лә тәржемә итә.
Исем туйында Динис Бүләковтың ижадташ дуҫы, Башҡортостандың халыҡ шағиры, БР Дәүләт Йыйылышы – Ҡоролтай депутаты Рауил Бикбаев, Башҡортостан мосолмандар Диниә назараты рәйесе Нурмөхәмәт хәҙрәт Ниғмәтуллин, танылған йәмәғәт эшмәкәре Тәлғәт Сәғитов, әҙиптәр Ғәлим Хисамов, Ҡәҙим Аралбаев, Тимерғәле Килмөхәмәтов, Ирек Кинйәбулатов, Гөлфиә Юнысовалар сығыш яһаны. Осрашыуҙа шулай уҡ яҙыусының тормош иптәше Рәйлә Бүләкова, ҡыҙҙары һәм кейәүҙәре, ейән-ейәнсәрҙәре ҡатнашты. Сығыштар Динис Бүләков яратҡан көй-моңдар менән үрелеп барҙы. Сығанаҡ: «Ашҡаҙар»