Ошо көндәрҙә Зәйнәб Биишева исемендәге «Китап» нәшриәтендә Мәскәүҙә йәшәп ижад итеүсе Башҡортостандың халыҡ яҙыусыһы Талха Ғиниәтуллиндың әҫәрҙәре йыйынтығының I томы донъя күрҙе. Рус телендә сыҡҡан баҫмаға әҙиптең 32 эссеһы һәм хикәйәләре тупланған.

Яҙыусының ижады тыуған ергә оло һөйөү менән һуғарылған. Әҙип һәр әҫәрендә ябай кешенең көнкүрешен, уның борсолоуҙарын, эске донъяһын бар тулылығында асырға тырыша һәм шуға ирешә лә. Талха Ғиниәтуллиндың хикәйәләре автобиографик һәм эскерһеҙ булыуы менән дә уҡыусыны йәлеп итә. Уларҙа һәр кемде уйланырға мәжбүр иткән үткер темалар күтәрелә.

Нәшриәттә хәбәр итеүҙәренсә, халыҡ яҙыусыһының әҫәрҙәрен туплаған йыйынтыҡ V томдан торасаҡ, әле I томды нәшриәт кибетендә һатып аырға мөмкин.