Республиканың күп һанлы гәзит-журналдары араһында «Тамаша» үҙенсәлеклелеге менән айырылып тора. Башҡортостан мәҙәниәтенең үткәнен, бөгөнгөһөн сағылдырған, киләсәген күҙаллаған журнал ул. Был баҫманы һәр ҡала һәм ауылда, бигерәк тә мәҙәниәт усаҡтарында түҙемһеҙлек менән көтөп алалар.

«Тамаша»ның тап Ҡырмыҫҡалыла осрашыу үткәреүе осраҡлы түгел. Журнал хеҙмәткәрҙәре һәм уны яратып уҡыусылар район мәҙәниәт йортондағы «Тамаша» - замана көҙгөһө тигән кисәгә йыйылды.

Осрашыу кисәһенә күренекле драматург, «Тамаша»ның тәүге мөхәррире Наил Ғәйетбай, шағир Ирек Кинйәбулатов, сатирик-яҙыусы Марсель Сәлимов һәм тележурналист Шәүрә Ғилманова килде. Сараға йыйылыусылар уларға үҙҙәрен ҡыҙыҡһындырған һорауҙарын бирҙе. Шулай уҡ, яҡташтары журналдың баш мөхәррире Фәнил Ҡоҙаҡаевты 60 йәшлек юбилейы менән дә ҡотланы.

«Тамаша»ның баш мөхәррире әйтеүенсә, журналдың эстәлеген байытыу, камиллаштырыу өҫтөндә эш бара. Тимәк, уҡыусылар менән бәйләнеш өҙөлмәйәсәк, яңынан-яңы ҡыҙыҡлы рубрикалар тәҡдим ителәсәк.