Журналыбыҙҙың баш мөхәррире, ҡырмыҫҡалыларҙың Өфөләге яҡташтар ойошмаһы рәйесе Ф. Ҡоҙаҡаев 112-се Башҡорт кавалерия дивизияһына ҡағылған тарихи материалдар, ветерандарҙың иҫтәлектәрен йыя, яҡташы генерал М. Шайморатовтың хәрби юлы һәм яҙмышы хаҡында мәғлүмәттәр туплай.

Күптән түгел уны данлыҡлы дивизияның 1941–1943 йылдарҙағы политбүлек начальнигы Салауат районында тыуып үҫкән Ә. Абдуллиндың тыуыуына 100 йыл тулыуға арналған кисәгә саҡырҙылар.

“Тамаша” журналы күберәк мәҙәниәт һәм сәнғәт темаларын яҡтырта, әммә уның биттәрендә яугир яҙыусыларҙың әҫәрҙәре, фронт бригадалары составында сығыш яһаған артистар хаҡында материалдар йыш баҫылып тора. 

Ф.Ҡоҙаҡаев йыйылыусыларға ошо хаҡта һөйләне, башлыса Башҡортостан яугирҙарынан ойошторолған һуғышҡа ҡабаттан 1942 йылда ингән 95-се дүрт орденлы Полтава уҡсылар гвардия дивизияһының яҙмышы Башҡорт кавалерия дивизияһыныҡынан бер ни менән дә айырылмауы хаҡында бәйән итте.

Ҡыҙғанысҡа ҡаршы, дивизияның Өфөлә күп йылдар эшләп килгән ветерандар Советы, билдәле сәбәптәр арҡаһында хәҙер эшмәкәрлеген туҡтатҡан. Әммә мәрхүм булған ветеран-яугирҙарҙың балалары Советтың эшен дауам итергә булған, “Дивизияның улдары” тигән ойошма төҙөгән. Улар үҙ эшмәкәрлеген 112-се Башҡорт кавалерия дивизияһының ветерандар Советы өлгөһөндә ойоштормаҡсы.

Ә. Абдуллиндың сарала ҡатнашҡан яҡташтары Искәндәр Миһранов, Ғәтиәт Садиҡов үҙ сиратында “Тамаша” журналын ҡыҙыҡһынып уҡып барыуҙары, артабан да баҫмаға яҙыласаҡтары хаҡында һөйләне, ике туғанлашҡан Салауат менән Ҡырмыҫҡалы райондарының хеҙмәттәшлеген үҫтереү буйынса тәҡдимдәр әйтте.

К.Шамсетдинов