Мәскәү ҡалаһында үткән «Включайся» тип исемләнгән халыҡ-ара балалар телевидениелары фестивалендә «Башҡортостан» дәүләт телерадикомпанияһының «Тамыр» студияһы ҙур уңышҡа өлгәште.
Фестивалдә Рәсәй, Белоруссия һәм Ҡаҙағстандан 80 телекомпания ҡатнашты. Конкурста 8 номинацияла ике йөҙҙән ашыу эш күрһәтелгән. «Тамыр» телеканалының «Герой-балалар» исемле эше документаль фильм номинацияһында еңеп сыҡты. «Музыкаль дебют» номинацияһында «Өфөнөң йәш виртуозы» проекты беренсе урын алған. Ә «Физра» тапшырыуы иһә бер юлы өс номинацияла иң яҡшыһы тип билдәләнгән. Ҡиммәтле приздар һәм дипломдарҙан тыш, был тапшырыуға «Карусель» Бөтә Рәсәй телеканалында эфир ваҡыты бүлеү тураһында ла һөйләшелгән.
Телеканал хеҙмәткәрҙәрен оло еңеүҙәре менән ихлас ҡотлайбыҙ!