Танылған яҙыусы һәм ғалим Суфиян Поварисов — «Яҙмыш ҡорбандары», «Ут эсендәге мөхәббәт» һәм «Ҡанлы бәхет» исемле һуғыш хаҡындағы трилогиялары өсөн Салауат Юлаев исемендәге дәүләт премияһына тәҡдим ителде. 

Суфиян Шәмсетдин улы 300-гә яҡын ғилми хеҙмәт, шул иҫәптән мәктәптәр һәм юғары уҡыу йорттары өсөн әсбаптар авторы. Ул егерменән ашыу әҙәби әҫәр баҫтырып сығарған. Уның тағы ла «Пәйғәмбәр таңы» (1995 й.) романы, «Ышанам һиңә» (1984 й.) повесы һәм башҡа әҫәрҙәре бар. «Көйҙөргән дә тел, биҙҙергән дә тел» (1970 й.), «Кәрлә йондоҙ» (1974 й.) комедиялары, «Ауылымдың алһыу таңдары» (1986 й.) драмаһы авторы. С. Поварисов III дәрәжә Дан (1945 й.), II дәрәжә Ватан һуғышы (1990 й.) ордендары менән наградланған. Бөгөнгө көнгә 88 йәшлек әҙиптең 62 китабы (9 роман, 10 повесть, 18 сәхнә әҫәре, публицистика, яҙыусылар теле тураһында фәнни хеҙмәттәре һ.б.) бар.