Баймаҡта тыуып үҫкән Абрек Абыҙгилдин 50 йылдан ашыу Ҡазанда йәшәй. Яҡташыбыҙ Рәсәйҙең атҡаҙанған, Татарстандың халыҡ рәссамы, Ғабдулла Туҡай исемендәге премия лауреаты, оҙаҡ йылдар күрше республиканың рәссамдар берлеген етәкләй. Ошо көндәрҙә Абрек Абыҙгилдинға 75 йәш тулды.

Мостай Кәрим, Ишмулла Дилмөхәмәтов, Аҡмулла, Башҡортостан тәбиғәте. Абрек Абыҙгилдиндың Ҡазан Кремлендәге «Хазина» милли сәнғәт галереяһында асылған күргәҙмәһе Татарстан башҡорттарына тыуған яҡ һулышын бүләк итте. Бында рәссамдың 100-гә яҡын ижад емеше урын алған.

Һынлы сәнғәт аҡһаҡалы. Уның ижад емештәрен бергә теҙгәндә Баймаҡ менән Ҡазанды тоташтырырлыҡ күпер һалырға мөмкин. Абрек Абыҙгилдин бар ғүмерен картиналар яҙыуға бағышлай һәм буяуҙар аша халыҡтың йәшәйешен сағылдыра.

Күренекле яҡташыбыҙ ижадында тарих менән заман, изгелек менән яуызлыҡ, зауыҡ менән битарафлыҡ осраша. Рәссам һөнәр түгел, күңел торошо, ти Абрек Абыҙгилдин.

Портрет, пейзаж, натюрморт. Абрек Абыҙгилдиндың ижадында төрлө алымдар, йүнәлештәр берләшә. Күргәҙмәгә килеүселәр ҙә рәссамдың эштәрендә тормош ысынбарлығы ярылып ятыуын билдәләй.

Рәссамдың картиналары донъяның төрлө мөйөштәрендәге музейҙарҙа, шәхси коллекцияларҙа һаҡлана. Юбилейы айҡанлы Абрек Абыҙгилдин һынлы сәнғәт өлкәһендәге иң юғары награда - Сәнғәт академияһының алтын миҙалына лайыҡ булды. Шулай ҙа 75 йәшен билдәләгән ижадсының иң ҙур хыялы - тыуған яғы Башҡортостанда шәхси күргәҙмәһен ойоштороу.

Сығанаҡ: Башҡортостан юлдаш телевидениеһы