Оҙаҡламай Өфөлә ШОС һәм БРИКС илдәренең саммиттары уҙасаҡ. Уның һөҙөмтәһендә баш ҡалабыҙ донъяла киңерәк билдәлелек аласаҡ һәм эшҡыуарҙар, туристар ағымы ла көсәйәсәк, ти белгестәр. Республикбыҙ халҡы Башҡортостандың һәм Өфөнөң халыҡ-ара кимәлдәге абруйын күтәреү йәһәтенән бындай ҙур сараның юғары кимәлдә, һәр яҡлап лайыҡлы уҙыуын теләй һәм быға булышлыҡ итә.

ШОС һәм БРИКС илдәре саммиттарына килгән төрлө илдәр вәкилдәре, әлбиттә, республикаға исем биргән төп халыҡтың мәҙәниәте, шул иҫәптән театр сәнғәте менән дә ҡыҙыҡһынасаҡ. Мәжит Ғафури исемендәге Башҡорт дәүләт академия драма театры 6 июлдә 1812 йылғы Ватан һуғышы геройы, тарихи шәхесебеҙ Ҡаһым Мерҙәшев хаҡында патриотик тойғо, юғары идеялар, милли рух менән һуғарылған тәрән йөкмәткеле «Ҡаһым түрә» (Б.Бикбай, Х.Иргалин, реж. О. Ханов) драмаһын, 7 июлдә - исеме бөтә донъяға билдәле балет бейеүсеһе Рудольф Нуриевтың ижады һәм тормошона арналған спектакль, 8 июлдә - халыҡ йолаларына, музыкаға бай «Шәүрәкәй» (М.Буранғолов, реж. А.Абушахманов) музыкаль комедияһын һәм 9 июлдә - башҡорт халыҡ эпосы нигеҙендә ижад ителгән «Маҡтымһылыу, Әбләй һәм Ҡара юрға» (Т.Ғарипова, реж. О.Ханов) мюзиклын уйнаясаҡ.

Сығанаҡ: театр сайтынан алынды.