Өфөлә етенсе тапҡыр үтәсәк «Театр яҙы» республика фестивалендә Башҡортостандың 11 профессиональ театры ҡатнашасаҡ. 4–10 апрелгә тиклем барған фестивалдә театарҙар үҙҙәренең репертуарынан иң яҡшы 13 спектаклде тамашасы һәм жюри хөкөмөнә сығарасаҡ. Жюрила «Страстный бульвар», «Иные берега» журналдарының баш мөхәррире Наталья Старосельская (Мәскәү), «Культура» гәзите күҙәтеүсеһе Ирина Алпатова (Мәскәү), З.Исмәғилев исемендәге Өфө дәүләт сәнғәт академияһы доценты Галина Вербицкая һәм уның театраль тәнҡит бүлеге студенттары. Фекер алышыуҙа актерҙар һәм режиссерҙар ҙа актив ҡатнашасаҡ.

БР Мәҙәниәт министрлығында әйтеүҙәренсә, фестиваль сиктәрендә хәҙерге драматургия буйынса ижади лаборатория эшләйәсәк.

Фестиваль быйыл үҙенең 20 йәшен билдәләй. Ул тәүге тапҡыр 1993 йылда Салауат ҡалаһында БР Мәҙәниәт министрлығының сәнғәт бүлеге ойоштороуында үткәйне.

Сығанаҡ: Башинформ мәғлүмәт агенствоһы