4–10 апрель Өфөлә «Театр яҙы» VII Республика фестивале үтәсәк. Фестивалде ойоштороусы БР Мәҙәниәт министрлығы. Әйтеп үтергә кәрәк, «Театр яҙы» Өфөлә икенсе тапҡыр үтә, тәүгеһе 2009 йылда уҙғайны.

Быйылғы йылда сағыу тамашала 11 профессиональ театрҙарҙың ҡатнашыуы көтөлә: Өфө, Салауат, Сибай, Стәрлетамаҡ, Туймазы ҡалалары театрҙары. «Театр яҙында» төрлө аудиторияға иҫәпләнгән 13 спектакль күрһәтеләсәк.

М.Ғафури исемендәге Башҡорт академия драма театры, М.Кәрим исемендәге Милли йәштәр театры, «Нур» Өфө дәүләт татар театры, Рус академия драма театры, Салауат башҡорт драма театры, Стәрлетамаҡ башҡорт драма театры, А.Мөбәрәков исемендәге Сибай башҡорт драма театры, Туймазы татар драма театры, «Сулпан» Сибай балалар театры, Стәрлетамаҡ рус драма театры сәмле ярышта еңеү яулау маҡсатында ҡыҙыу эш осоро кисерәләр, ролдәр өҫтөндә тырышып эшләйҙәр.

Ысынлап та, «Театр яҙы» республика мәҙәниәтендә күптән үҙ урынын яулаған абруйлы, тамашасы көтөп алған фестивалдәрҙең береһе. Ижади бәйләнештәрҙең нығыныуында, театр үҫешендә уның роле ҙур. Быйылғы фестиваль шуныһы менән дә үҙенсәлекле, 8–9 апрель конкурс сиктәрендә Рус академия драма театры нигеҙендә хәҙерге драматургия буйынса ижади лаборатория эшләйәсәк.