«Театр яҙы» сиктәрендә Туймазы татар драма театрының «Бөкө» спектакле
Туймазы татар драма театры «Театр яҙында» юғарыла әйтеп кителгән пьесаны сәхнәләштерәсәк.
Ҡалаға илтә торған оло юлда күп машиналар туҡтап ҡалған, сөнки юл хәрәкәтен туҡтатҡандар. Шул арҡала тығындар барлыҡҡа килгән. Арыуыҡ ваҡыт үтә, кешеләр хатта бер-береһе менән танышып бөтә.
Ҡалаға берәүҙә тиктомалдан китеп бармай, һәр кемдең үҙ мәшәҡәте: йәш кенә ҡатын таксила бала табырға китеп бара, хаҡлы ялдағы бабай иҫке генә машинаһында ейәндәренә аяҡҡа баҫырға ярҙам итеү маҡсатында баҙарға һатыу итергә китеп бара, сит ил машинаһында яңғыҙ ҡатын Сэр исемле эте менән, шундай уҡ ҡиммәтле машинала бер-береһенән ялҡып бөткән ир менән ҡатын да ҡалаға юл тота...
Ни өсөн юлды япҡандар, бер кемгә лә мәғлүм түгел. Бәлки быға күк йөҙөндә кинәт кенә барлыҡҡа килгән серле яҡтылыҡ сәбәпселер? Ҡыҙғылтыраҡ ут юлаусыларҙың күңеленә шом һала. Алда уларҙы нимә көтә? Автор юлдағы тығынды һүрәтләү аша, бөтөн илебеҙ килеп терәлгән көрсөккә ишараламай микән?..
Социаль проблемаларҙы күтәргән И.Зәйниевтың комедияһы 6 апрель «Нур» Өфө дәүләт татар театры сәхнәһендә 19.00 сәғәттә башлана.