5 май Мәжит Ғафури исемендәге Башҡорт дәүләт академия драма театрында үткән Туфан Миңнуллиндың «Әсәйҙәр һәм бәпәйҙәр» пьесаһы буйынса «Мин – ҡатын-ҡыҙ» (режиссеры - Илсур Ҡаҙаҡбаев) премьера спектакленә Татарстандан Туфан Ғабдулла улының ғаиләһе: тормош юлдашы - Татарстан Республикаһының һәм Рәсәй Федерацияһының халыҡ артисткаһы, Татарстандың Ғ.Туҡай ис. дәүләт премияһы лауреаты Нәжибә Ғимаделислам ҡыҙы Ихсанова һәм драматургтың һөйөклө ҡыҙы Әлфиә Туфан ҡыҙы килде. Йәш режиссерҙың Туфан Миңнуллиндың үлемһеҙ пьесаһына мөрәжәғәт итеп, уны ваҡыт күҙлегенән «уҡыуы», бишек йыры жанрында заманса сәхнәләштереүе, спектаклдең художество һәм музыкаль яҡтан отошло биҙәлеше пьесаның үҙенсә яңғырашына булышлыҡ итеүен билдәләп үтте юғары ҡунаҡтар. Был кистә һәр кем Туфан Миңнуллиндың яҡты рухын иҫкә алды.