Баймаҡ районының Темәс ауылы мәктәбендә «Ҡурай-моңдар иленә сәйәхәт» тип аталған театрлаштырылған тамаша үтте. Сараны «Темәс» башҡорт тарихи-мәҙәни үҙәге ойошторҙо. Унда яҡынса 85 кеше, шул иҫәптән мәктәп уҡыусылары һәм «Ғилмияза» фольклор коллективы артистары ҡатнашты.

Тамаша барышында ҡатнашыусылар башҡорт халҡының матди һәм рухи мәҙәниәте – йырҙар, бейеүҙәр, таҡмаҡтар, йомаҡтар, уйындар, милли костюмдар һәм биҙәүестәр менән танышты, тип хәбәр иттеләр «Темәс» башҡорт тарихи-мәҙәни үҙәгенән.

Темәс урта мәктәбе етәкселеге тарихи-мәҙәни үҙәк хеҙмәткәрҙәренә һәм «Ғилмияза» фольклор коллективы артистарына матур байрам өсөн рәхмәт белдерҙе һәм бындай сараларҙы йышыраҡ үткәреүен һораны, сөнки улар йәш быуында әхлаҡлылыҡ һәм үҙ мәҙәниәтенә ҡарата һөйөү тәрбиәләй.

Сығанаҡ: «Башинформ» МА