6-13 сентябрҙә Өфөлә төрки телле театрҙарҙың «Туғанлыҡ» V халыҡ-ара фестивале үтә. Уны ойоштороусылар 4 сентябрҙә, «Башинформ» мәғлүмәт агентлығында журналистар менән осрашты.

«Туғанлык» фестивале республикала быйыл бишенсе тапҡыр уҙа. Уны ойоштороу идеяһы авторҙарының береһе Рифҡәт Исрафилов әлеге сараның тарихына күҙ һалды. Мәҙәниәт министрлығынан Айгөл Ҡарабулатова быйылғы фестивалдең үзенсәлектәренә туҡталды.

— «Туғанлык» фестивале быйыл ТЮРКСОЙ ағзалары булған илдәр мәҙәниәт министрҙары менән берлектә ойошторола. Шуға күрә республикаға бик күп мәртәбәле ҡунаҡтар йыйыласаҡ. ТЮРКСОЙ ҡарары менән БАССР-ҙың халыҡ артисты, РСФСР-ҙың атҡаҙанған мәҙәниәт эшмәкәре, ҡурайсы, педагог, йырсы һәм актер Ғата Сөләймановтың исеме донъяуи әһәмиәткә эйә мәшһүр шәхестәр исемлегенә индерелде. Был уңайҙан беренсе көндә үк ҙур сара ойоштороласаҡ.

Ҡалған биш көндә жюри ағзаларына 14 спектакль тәҡдим ителәсәк. Ҡатнашыусылар Алтай, Ҡырғыҙстан, Татарстан, Хакасия, Ҡазахстан, Дағстан, Саха (Якутия), Төркиә, Әзербайжан, Ҡабарҙы-Балҡар, Сыуашстан, Ҡырым (Украина), Молдованан киләсәк. Мәҗит Ғафури исемендәге Башҡорт дәүләт академия драма театры Мостай Кәримдең «Ай тотолған төндә» трагедияһы менән ҡатнаша. Конкурстан тыш, программала республикалағы барлыҡ милли театрҙар ҙа сығыш яһай. 

Бынан тыш, Төньяҡ Кавказ, Абхазия һәм Көньяҡ Осетия режиссерҙарының Рифҡәт Исрафилов етәкселегендәге ижади лабораторияһы эшләйәсәк, шулай уҡ «Мәдәниәттәр диалогы һәм төрки телле театр» тип аталған фәнни-ғәмәли конференция ойоштороласаҡ.

«Туғанлыҡ» фестивале театр һөйөүселәр өсөн онотолмаҫ байрам булыр, театр коллективтарының ижади үҫешенә, бер-береһе менән хеҙмәттәшлегенә яңы һулыш бирер, тип көтөлә.

Фото : Кирилл Тимашев 

«Башҡортостандың мәҙәни донъяһы»