Туймазы татар дәүләт драма театрының «Тю-тю, мөхәббәт, йәки Тауыҡбаш» комедияһы (Николай Коляданың «Тауыҡ» комедияһы буйынса, Милли йәштәр театры режиссеры Илнур Муллабаев сәхәнәләштергән) быйыл йәй айында Екатеринбург ҡалаһында үткән VI Халыҡ-ара «Коляда-PLAS» замана драматургияһы театрҙар фестивалендә ҡатнашты.

Николай Коляда, спектаклдең видеояҙмаһын осраҡлы ғына күреп ҡалып, ҡыҙыҡһынып китеп, театрҙы фестивалгә ҡатнашырға саҡыра. Был тәҡдимде театр коллективы шатланып ҡабул итә.

Коллектив “Фестиваль асышы” дипломы менән бүләкләнә, ә Башҡортостандың атҡаҙанған артисы Гөлнара Ғәбиҙуллина төп героиня Алһыу роле өсөн махсус призға лайыҡ була. 

“Коляда-PLAS” фестивале алтынсы тапҡыр үткән. Бында Урал драматургтары яҙған пьесалар буйынса ҡуйылған спектаклдәр ҡатнаша һәм “Евразия-2012” конкурсы лауреаттары бүләкләнә. Фестивалдең маҡсаты бөгөнгө көн хаҡында яҙған йәш авторҙарҙы асыу, үҫтереү генә түгел, ә һәләтле актерҙар, режиссерҙар, рәссамдарҙың эштәре менән дә танышыу.

Унда бөтәһе 17 театр, шулар араһында Екатеринбург, Силәбе, Санкт-Петербург, Новоуральск, Ижевск, Озерск, Кишинев һәм Варшава театрҙары ла сығыш яһай.