Сит яҡтарҙың һауаһын һулаһаҡ та, һыуын эсһәк тә, ерен тапаһаҡ та, тыуған төйәктән ҡәҙерлерәк төбәк юҡ. Ошо һүҙҙәрҙең хаҡлығына Әбйәлил районы­ның Ишбулды ауылында ойошторолған «Һаумыһығыҙ, ауылдаштар!» байрамына ҡайтҡандар тағы бер тапҡыр инанды.

Былтыр яҙ Ҡыҙыл йылғаһы оҙайлы ямғыр­ҙар арҡаһында ярҙарынан сыҡҡайны. Һөҙөм­тәлә урындағы халыҡ әллә күпме матди зыян күрҙе. Ә бөгөн ауыл шул тиклем үҙгәр­гән, матурайған, әйтерһең дә, бында бер ниндәй ташҡын, бәлә-ҡаза булмаған. Был ишбулды­ларҙың татыу­лығы, берҙәмлеге хаҡында һөйләй. Өҫтәүенә, зарланып, ҡул ҡаушырып ултырырға яратмай улар. Һәр береһе хәленән килгәнсә матур, етеш йәшәргә ынтыла. Шуға байрамға ла ҡунаҡтар алдында йөҙ ҡыҙармаҫлыҡ итеп әҙерләнгәйнеләр. 

Ауыл халҡын был сара менән ҡотларға мәртәбәле ҡунаҡтар – Әбйәлил район Советы рәйесе Ҡотдос Ғәзизов, район Советы депутаты Мәреүән Утарбаев, район хакимиәте вәкиле Урал Хәлисов һәм башҡалар – килде. 

– Беҙҙә урамдар тигеҙ урынлашмаған, шуға күркәм сараны үткәрер алдынан ауылды биш «округ»ка, йәғни өлөшкә бүлдек тә улар араһында төрлө номинациялар буйынса бәй­геләр иғлан иттек. Мәҫәлән, «Үҙенсәлекле иха­та» номинацияһында Кинйәбикә менән Рәфҡәт Боҫҡоновтарға тиңдәр булманы. Улар файҙа­ланыл­ған тәгәрмәстәрҙән аҡҡош, фил кеүек һындар эшләгән, шулар менән түтәлдәр яһап, сәскә ултыртҡан, – ти ауылдың ҡатын-ҡыҙҙар советы рәйесе Миңзәлә Хәли­сова.

Ишбулдыла уңған, татыу ғаиләләр күп. Шуға «Өлгөлө ғаилә» номинацияһында еңеү­селәрҙе асыҡлау еңел булмағандыр. Мәүлиҙә менән Сәйфулла Ғүмәровтар, Рәйлә менән Айрат Хәлисовтар, Вәсилә менән Айбулат Хәй­бул­линдар, Гүзәлиә менән Рөстәм Шөкө­ровтар, Фәрзәнә менән Иштимер Хажиндар иң-иңдәре тип табылды. Гөлсинә менән Рөс­тәм Хәлисов­тар, Зәйтүнә менән Ғәйфулла Ғүмә­ровтар, Рабиға менән Наил Ғүмәровтар, Әлмира менән Насип Зариповтар, Миләүшә менән Әхтәм Боҫҡоновтар, Фирҙәүес Зарипова, Эльвира ме­нән Таңатар Хәйруллиндар, Әсмә менән Ғәли Айытбаевтарҙың йорто баш­ҡаларға өлгө бу­лырлыҡ. 

«Һаумыһығыҙ, ауылдаштар!» байрамын көрәш, волейбол, ҡалаҡҡа йомортҡа һалып йүгереү кеүек ярыштарҙан тыш күҙ алдына ла килтереп булмай. Әйткәндәй, көрәш буйынса район бәйгеләрендә лә Ишбулды егеттәренә тиңдәр аҙ. Был юлы ла ауылдан Артур Шәмсетдинов абсолют чемпион тип танылды. 

Автор: Айһылыу ӘХМӘТОВА.

Сығанаҡ: "Башҡортостан" гәзите.