24 апрелдә Мәскәүҙә Башҡортостан Президенты Рөстәм Хәмитов музыкант Олег Кирәевҡа «Башҡортостан Республикаһының халыҡ артисы» билдәһен тапшырҙы, тип хәбәр иттеләр төбәк башлығының матбуғат хеҙмәтенән. Был маҡтаулы исем уға Башҡортостан Президентының 2012 йылдың 1 мартындағы указы менән Башҡортостан Республикаһының музыка сәнғәтен үҫтереүгә ҙур өлөш индергәне өсөн бирелде.

— Яңы исемгә лайыҡ булып, Олег Хөсәйен улы беҙҙе концертҡа саҡырыр, тип уйлайым, — тине Рөстәм Хәмитов, артисҡа награда тапшырып.

Олег Кирәев республика башлығына юғары награда өсөн рәхмәт белдерҙе һәм Рөстәм Хәмитовты «Европа, донъя сәнғәтен яратҡан һәм беҙҙең милли фольклорға һаҡсыл ҡарашта булған кеше» буларҡ белеүен билдәләне.

— Мин үҙ тормошомда беҙҙең туған моңдарҙы джаз менән берләштереү менән шөғөлләндем. Бының ярҙамында күптәр ҡумыҙ менән ҡурайҙың нимә икәнен белде, — тине музыкант.

Сығанаҡ: «Башинформ»