Стәрлетамаҡ һәм Бөрө ҡалаларының бала йорттарында, шулай уҡ Ш.Хоҙайбирҙин исемендәге 1-се Республика бала йортонда тәрбиәләнеүселәр «Йондоҙлоҡ» бөтә Рәсәй балалар художестволы ижады конкурсының аҙаҡҡы этабында ҡатнашасаҡ. Сара Мәскәүҙә үтәсәк.

РФ Мәғариф һәм фән министрлығы менән ойошторолған бәйгелә Рәсәйҙең 24 субъектынан ата-әсә ҡарауынан мәхрүм ҡалған 12-17 йәштәрҙәге 200-гә яҡын бала ҡатнашасаҡ.

Һөҙөмтәләр буйынса дүрт номинацияла лауреаттар һәм дипломанттар билдәләнәсәк.

«Йондоҙлоҡ» конкурсы һәләтле етем балаларҙы асыҡлау һәм уларға ярҙам итеү маҡсатында үткәрелә. Бынан тыш, ойоштороусылар иҫәпләүенсә, унда ҡатнашыу бала йорттарында тәрбиәләнгән малай һәм ҡыҙҙарға һәләттәрен асыҡлау, тиҫтерҙәре менән аралашыу, яңы дуҫтар табыу мөмкинлеген бирә.