2014 йылдың 2-8 июнендә Ҡазанда Төрки халыҡтарының III Халыҡ-ара «Науруз» театр-белем биреү форум-фестивале уҙа. Форумда Германия, Греция, Колумбия, Рәсәй һәм Франциянан килгән театр сәнғәте һәм менеджменты буйынса әйҙәүсе белгестәр етәкселегендә семинарҙар, мастер-кластар һәм лекциялар тәҡдим ителә. Белгестәр араһында – Пуче Алехандро Гонсалес (Кале, Колумбия), Димитрис Тиамис (Афина, Греция), Альшиц Юрий Леонович (Берлин, Германия), Бурова Светлана (Париж, Франция), Борисов Андрей Саввич (Яҡут-Саха), Дадамян Геннадий Григорьевич (Мәскәү), Дмитриевская Марина Юрьевна (Санкт-Петербург), Мочалова Людмила Георгиевна (Санкт-Петербург), Степанова Анна Анатольевна (Мәскәү), Скоморохов Сергей Геннадьевич (Ҡазан) һ.б. бар.

«Науруз» форумы – Төрки халыҡтарының “Науруз” Халыҡ-ара театр фестивале етәкселеге ойошторған театраль белем биреү проекты. Форум сиктәрендә ижади эштәр 5 йүнәлештә барасаҡ: актерлык сәнғәте һәм практик режиссура; режиссура теорияһы, сценография һәм музыкаль театр; театр социологияһы, менеджмент, пиар, хоҡуҡ белеме; ҡурсаҡ театры сәнғәте; театр тәнҡите. Форум программаһында барыһы 36 семинар, 18 тренинг, 7 лекция, 5 спектакль һәм 4 мастер-класс планлаштырылған.

Мәжит Ғафури исемендәге Башҡорт академия драма театрынан фестивалдә 5 кеше ҡатнаша.