Йәрмәкәй районында «Ата-бабалар ере» тип исемләнгән төбәк-ара ижади фестиваль үтте. «Имен бала саҡ һәм ғаилә ҡиммәттәрен нығытыу» йылына һәм 1812 йылғы Ватан һуғышындағы Еңеүҙең 200 йыллығына арналған сара урындағы халыҡтың уртаҡ байрамына әйләнде.
Ыҡ йылғаһы Башҡортостандың Бәләбәй, Йәрмәкәй, Туймазы, Шаран райондарының, шулай уҡ Татарстан менән Ырымбур өлкәһенең уртаҡ хазинаһы. Уны һыулаған халыҡ моңло ла, дәртле лә. Быны фестиваль дә иҫбатланы. Сарала эргә-тирәләге район-ҡалаларҙан, күрше төбәктәрҙән 500 ашыу кеше ҡатнашты. Гала-концертта сығыш яһаусы һәр ғаилә үҙ усағының ныҡлығын, татыулығын күрһәтте. Ғаилә ансамблен төҙөгән Муллағәлиевтарға ҡарап һоҡланмау мөмкин түгел. Улар 2 урынға лайыҡ булды.
Ыҡ буйы фестивале Йәрмәкәй ерлегенән башлана. Һуңынан ул Баҡалы районында, Бәләбәйҙә һәм Татарстандың Баулы ҡалаларында үтә. 2007 йылдан кире Йәрмәкәйгә әйләнеп ҡайтҡан сара хәҙер йыл һайын уҙғарыла. Маҡсаты халыҡтар дуҫлығын, милләт ара-татыулыҡты нығытыу.
Лайыҡлылар төрлө номинациялар буйынса баһаланды. Уларға ҡиммәтле бүләктәр, Маҡтау ҡағыҙҙары тапшырылды. Ә иң мөһиме, Ыҡ йылғаһы буйында йәшәгән халыҡтарҙың «Ата-бабалар ере» төбәк-ара ижади фестивале ғаиләгә дан йырланы, абруйын күтәрҙе. Был йәһәттән фестиваль үҙ маҡсатына иреште. Сығанаҡ: Башҡортостан юлдаш телевидениеһы