Башҡортостандың мәшһүр йырсыһы Рамаҙан Йәнбәковҡа 79 йәш тулды. Республиканың йыр сәнғәтен үҫтереүгә, йәштәрҙе тәрбиәләүгә ҙур көс һалған сәхнә әһеленең ҡанаты аҫтында халыҡ йырҙарын башҡарыусы бер төркөм сәнғәт оҫталары үҫеп сыҡты.

Рамаҙан Йәнбәков - үҙенсәлекле моңға эйә халыҡ йырсыһы. Шуға ла уның илаһи тауышын хазинаға тиңләйҙәр. Репертуарындағы «Сәлимәкәй», «Йәнбикә», «Ильяс», «Түрәкәй», «Юлғотло», «Төйәләҫ» кеүек йырҙар лайыҡлы рәүештә милли сәнғәтебеҙҙең алтын фондын тәшкил итә.

Баймаҡ районының йәмле Урғаҙа йылғаһы буйында урынлашҡан Байыш ауылында тыуһа ла, яҙмыш уны 1-се Этҡол балалар йортона алып килә. Үкһеҙ етем ҡалған бала урындағы халыҡ менән бик тиҙ уртаҡ тел таба. Сөнки бында үҙе кеүек йыр-моңға ғашиҡ кешеләр менән аралашып йәшәй. Ауылдың данлыҡлы ҡурайсылары уйнаған оҙон көйҙәрҙе тыңлап үҫкән егеткә башҡорттоң халыҡ йырҙарын башҡарыу еңел бирелә.

Рамаҙан Йәнбәков 1-се Этҡол балалар йортонда тәрбиәләнгән осорҙа мәшһүр оҙон көй оҫтаһы Хөсәйен Әхмәтов йәш һәләттәрҙе һайлап алыу өсөн Баймаҡҡа килә. Ун өс йәшлек Рамаҙан «Буранбай» йырын һуҙа. Арҙаҡлы композитор, был егет - халыҡ гәүһәре, тыуған төйәгенең рухы, тип билдәләй. Уның юрағаны, ысынлап та, тормошҡа аша. Бер нисә йылдан һуң баш ҡалабыҙҙың Хөсәйен Әхмәтов исемендәге Башҡорт дәүләт филармонияһына эшкә килә. Шунан алып хаҡлы ялға сыҡҡансы тыуған коллективына тоғро ҡала.

Халыҡ Рамаҙан Йәнбәковты «Уның кеүек йырсылар дәүергә бер тапҡыр ғына тыуа» тип хөрмәтләй. Сәхнә оҫтаһының рухи хазинаға тиң тауышы килер быуындың да күңелен әсир итерлек, ти улар. Ә сәнғәт алдындағы фиҙаҡәр хеҙмәте, ҡаҙаныштары өсөн Башҡортостандың халыҡ артисы тигән маҡтаулы исемгә лайыҡ шәхестең үҙенә халҡы баһалауынан да ҡиммәтерәк бүләк юҡ.

Автор: Розалиә Йәнбәкова