Өфөлә халыҡ инструменттары ансамблдәре һәм оркестрҙарының «Урал ауазы» фестивале тамамланды. Конкурста Төркиә, Франция, Үзбәкстан, Ҡаҙағстан, Татарстан, Ҡалмыҡстан, Тыванан профессиональ артисттар ҡатнашты. Киров, Омск, Силәбе, Өфө, Стәрлетамаҡ, Сибай, Учалы һәм Октябрьский ҡалаларынан ансамблдәр ҙә үҙ оҫталыҡтарын күрһәтте. Фестивалдә ҡатнашыусыларҙың сығыштарын Рәсәйҙән, Республиканан һәм яҡын сит илдәрҙән профессиональ жюри баһаланы. Гран-прины Владикавказ ҡалаһынан «Тауҙар ритмы» ансамбле, Тыва милли оркестры һәм Ҡалмыҡ Республикаһы оркестры яуланы. Беренсе дәрәжәләге диплом менән Үзбәкстандың махсус ансамбле бүләкләнде. Икенсе, өсөнсө урындарҙы Башҡортостандан Октябрский музыка училищеһы һәм Өфө сәнғәт училищеһының ҡурайсылар ансамблдәре бүлеште. Конкурс һөҙөмтәләре буйынса төрки халыҡтарҙың милли инструменттары йыйылма оркестры төҙөлдө.