“Урал моңо” халыҡ-ара конкурс-фестивалендә республиканан ҡатнашырға теләгәндәр өсөн тәүге һайлап алыу туры үтте. 17 муниципаль берәмектән һәм ҡала округынан, шулай уҡ Ырымбур өлкәһенән, Төркмәнстандан 43 кеше бәйгелә ҡатнашырға теләк белдерҙе. Баһалама комиссияһына композитор Урал Иҙелбаев, Башҡорт дәүләт сәнғәт академияһының өлкән уҡытыусыһы, кафедра доценты Светлана Слягузова, “Ҡурай-ТВ” телеканалы директоры Айгөл Әхмәҙиева, фестивалдең режиссеры Илшат Фәхертдинов, Республика халыҡ ижады үҙәге белестәре инде. Конкурсанттарҙы тыңлап ҡарау йомғаҡтары буйынса икенсе турға 14 дәғүәсе һайлап алынды.
“Урал моңо-2014” төрки йәштәр фестивале Өфөлә 28 — 30 майҙа уҙғарыла. Уны республиканың Мәҙәниәт министрлығы, “Башҡортостан” дәүләт телерадиокомпанияһы һәм Республика халыҡ ижады үҙәге ойоштора. Автор: Р. ИБРАҺИМОВ.