Республикала хәҙер ун алтынсы тапҡыр «Урал моңо» төрки йәштәренең конкурс-фестивале уҙғарылды. Ошо ваҡыт арауығында ул әллә күпме ижадсыға ныҡлы ҡанат ҡуйҙы. Ике йылға бер үткәрелгән күркәм сараны республикабыҙ халҡы көтөп ала. Ни тиһәң дә, фестиваль төрлө халыҡ вәкилдәренең ҡабатланмаҫ сығышы менән күптәрҙең күңелен әллә ҡасан уҡ арбап өлгөргән. 

Быйылғы фестивалдә 50 конкурсант ҡатнашырға теләк белдерҙе. Дағстандан, Ҡабарҙа-Балҡар, Тыва, Татарстан, Ҡырғыҙстан, Яҡутстан, Ҡаҙағстан, Үзбәкстандан, Алтай, Кемерово өлкәһенән, Ставрополь өлкәләренән йыр-моңға ғашиҡтар йыйылды. 

Төрки халыҡтарының телдәрендә генә түгел, мәҙәниәтендә лә уртаҡ һыҙаттар бар. Илдәр тарҡалып, тығыҙ аралашыу мөмкинлеге кәмегәндә, ошондай саралар беҙҙе берләштереүҙә күпер булып тора ла инде. 

«Урал моңо-2012» фестивалендә ҡатнашыусылар республикалағы күркәм мәҙәни сараларҙан да ситтә ҡалманы. Бүздәк районында һабантуй байрамында булдылар, ә Иглиндә ҙур концерт программаһы менән сығыш яһанылар.

26 майҙа «Нефтсе» мәҙәниәт һарайында программаның иң сағыу өлөшө — Гала-концерт үтте. Унда еңеүселәрҙе тәбрикләнеләр. Быйылғы фестивалдә гран-приҙы Ҡаҙағстандан Нурбол Балапанов яуланы. Еңеүсегә диплом һәм 3 мең доллар күләмендә аҡсалата премия тапшырылды.