24 майҙа Өфөлә төрки йәштәрҙең XVI «Урал моңо» конкурс-фестивале башланды. Башҡорт дәүләт филармонияһында бәйгенең беренсе туры үтте. «Башинформ» агентлығында матбуғат конференцияһында Республика халыҡ ижады үҙәге етәксеһе Байрас Ишбирҙин хәбәр итеүенсә, конкурстан тыш, артистарҙы мәҙәни программа ла көтә: Иглин районына ҙур концерт менән барыу, теплоходта йөрөү, Бүздәк районында үтәсәк һабантуйҙа ҡатнашыу.

«Урал моңо — 2012» гала-концерты 26 майҙа 18 сәғәттә «Нефтсе» мәҙәниәт һарайында үтә. Инеү – саҡырыу билеттары буйынса. Интернет менән ҡулланыусылар концертты WWW.URALMONO.RU сайтында ҡарай ала. Гран-при яулаусы, төп наградаларҙан тыш, ТӨРКСОЙ-ҙан махсус приз — өс мең АҠШ доллары аласаҡ.

Йола буйынса йыр марафонында Ҡабарҙы-Балҡарҙан, Дағстандан, Ҡаҙағстандан, Башҡортостан, Хакасия, Тува, Алтай, Татарстан, Ҡырғыҙстан, Төркмәнстан, Саха (Якутия), Сыуашстан, Төркиәнән, Үзбәкстандан һәм Ҡарасәй-Черкес Республикаһынан йырсылар һәм ижади коллективтар, бөтәһе 50 кеше: 24 солист һәм 4 төркөм ҡатнаша.

Фестивалдә быйыл Башҡортостан данын Өфө ҡалаһынан «Арғымаҡ», «Латин кварталы» төркөмдәре, шулай уҡ Аралбаев Иҙел,  Миһманов Илнур, һәм Учалы ҡалаһынан Усманов Илдар яҡлаясаҡ.

— Бер сәхнәлә барлыҡ төрки телле халыҡтарҙы йыйырға теләр инек, — тип фестивалдең маҡсатын иҫкә төшөрҙө Башҡортостандың мәҙәниәт министры урынбаҫары Рәнис Алтынбаев.

— Беҙҙең фестивалдең мөхите башҡаларҙыҡынан айырылып тора, — тине ижади конкурс жюрийы рәйесе композитор Урал Иҙелбаев. – Уның маҡсаты – конкурентлы көрәш түгел, ә дуҫтарса йылы мөнәсәбәттәрҙе һаҡлап ҡалыуҙа.

Журналистар менән осрашыуҙа артистар ҙа булды. Төрки илдәр делегаттары милли костюмдарҙа килеп, осрашыуҙа ҡатнашыусыларҙы үҙҙәренең туған телдәрендә сәләмләне.

«Башҡортостандың мәҙәни донъяһы» порталы