Башҡортостан Республикаһының Милли музейында «Ҡусҡар» текстиль сәнғәте студияһы күргәҙмәһе эшләй. Билдәле булыуынса, заман ҡатын-ҡыҙҙары күп ваҡытын телевизор, компьютер артында ултырып үткәрә. Бик күптәр өсөн сигеү, бәйләм бәйләү, ғөмүмән, ҡул эштәре «әсәй-өләсәйҙәр заманындағы эш» һанала. Ысынлап та, хәҙер магазиндарҙа йәнең ни теләй, шул бар: шәлдәр, кофталар, күлдәктәр, бейәләйҙәр… Әммә ҡул эштәре менән ултырыу ниндәйҙер әйбер¬ҙең етешмәүенән түгел, ә күңел талабы. Шундай алтын ҡуллыларҙың «Ҡусҡар» текстиль сәнғәте студияһы бер йыл элек ойошторолған. Сәнғәт студияһында әлеге көндә ун ике ҡатын-ҡыҙҙан торған коллектив, милли орнаменттар, тамғалар ҡулланып, кейеҙҙән һәм ябай тауарҙан ҡурсаҡтар, уйынсыҡтар ижад итә, декоратив ҡорамалар ҡорай. «Ҡусҡар» студияһы етәксеһе Стелла Маркова әйтеүенсә, улар быға тиклем Бөтә Рәсәй фестивалдәрендә ҡатнашып, бихисап диплом һәм маҡтау ҡағыҙҙары яулап өлгөргән.
 «Башҡортостандың мәҙәни донъяһы» порталы