Танылған ҡурайсы Роберт Юлдашев «Курайсы» төркөмө менән Учалы һәм Белорет ҡалаларында яңы концерт программаһын күрһәтәсәк.
Роберттың концерттарын Башҡортостан халҡы ҙур ҡыуаныс һәм эске тулҡынланыу менән көтөп ала. Был үҙенсәлекле турне-концертта, Роберттың башҡарыуында ҡурай көйөн яратыусылар, популяр сит ил музыка өҙөктәрен һәм Ҡазанда үткән «Сотворение мира-2011» рок фестивалендә башҡарылған композицияларҙы ишетәсәк. Шулай уҡ концертта Роберт Юлдашев Башҡорт халҡы көйҙәренең тарихы, боронғо башҡорт музыка ҡоралының була торған мөмкинселектәре менән таныштырып үтәсәк. Ни өсөн был концерт үҙенсәлекле һуң, яуап бына нимәлә: тап ошо концертта Роберт һигеҙ ҡурайҙа сығыш яһаясаҡ – уларҙың етеһе ағастан эшләнгән булһа, береһе ҡамыштан. Әлеге көндә, профессиональ ҡурайсылар алты ҡурайҙа уйнайҙар, уларҙың һәр береһенең үҙенең тоналлеге бар.
Роберт Юлдашев Башҡортостанда ғына түгел, Рәсәй һәм донъя киңлектәрендә лә оло популярлыҡ яулай. Ул Владимир Спиваков һәм уның Рәсәй виртуоздары”, Николай Носков, Гарик Сукачев, Пелагея кеүек Рәсәй йондоҙҙары менән бер сәхнәлә сығыш яһап, милли музыка ҡоралыбыҙҙы данланы, уның мөмкинлектәренең сикһеҙлеген танытты.
Ҡурайҙың Башҡортостан киңлектәренән сығып, донъя гиҙеүе өсөн Роберт Юлдашевҡа афарин тип әйтергә генә ҡала. Әйткәндәй, яңыраҡ ҡына данлыҡлы ҡурайсы донъяның иң мәшһүр театры Ла-скала сәхнәһендә популяр опера йырсыһы, яҡташыбыҙ Илдар Абдразаҡов, Испания ҡалаларында Милли симфоник оркестры менән сығыш яһаны һәм тамашасыларҙың һушын алып, ҡурайға ғашиҡ иттерҙе.
Роберт Юлдашевтың ижадын яратыусылар 4–се февралдә Учалы ҡалаһында, 5–се февралдә Белорет ҡалаһында Ел көйө «Музыка ветра» тип аталған концертын тыңлай аласаҡ. «Башҡортостандың мәҙәни донъяһы» порталы