Яҙыусы, БР атҡаҙанған мәҙәнит хеҙмәткәре, Ғәли Ибраһимов исемендәге премия лауреаты Әһлиуллин Әхмәт Кәбир улы тыуыуына – 85 йыл (1927-2003).

Әхмәт Кәбир улы Стәрлетамаҡ районы Талас ауылында 1927 йылдың 23 февралендә тыуған. 

Стәрлетамаҡ районының Аллағыуат ауылында, үҙенең тыуған төйәге Таласта химия һәм биология фәндәренән уҡыта, мәктәп директоры вазифаһын намыҫ менән үтәй. Ул етәкселек иткән осорҙа был мәктәп ете йыллыҡтан һигеҙгә, аҙаҡ ун йыллыҡҡа үҙгәртелә. 

Әхмәт Әһлиуллиндың «Әбей рулдә» исемле тәүге әҫәре 1964 йылда «Ленинсы» республика йәштәре гәзитендә баҫыла. Етмешенсе йылдарҙа бер-бер артлы нәҫер, новелла, хикәйәләр, балалар өсөн урман әкиәттәре донъя күрә. 1974 йылда «Беҙ урманда йәшәйбеҙ» тигән тәүге китабы сыға. «Әсә мөхәббәте», «Һандуғас инәй» кеүек повестары менән уҡыусыларҙы һөйөндөрә. 

Яҙыусының төп хеҙмәте булып 1996 йылда баҫылып сыҡҡан «Эстәрле» тарихи роман-хроникаһы тора. Авторҙың икенсе күләмле китабы – «Кендек ҡаны тамған ер» романы. Ул 2002 йылда «Китап» нәшриәтендә баҫылып сыға.