Яҙыусылар союзында 75 йәшен туйлаусы шағир, яҙыусы, тәржемәсе Роберт Палгә арналған байрам сараһы үтте. Юбилярҙы ҡотларға Роберт Васильевичтың яҡындары, ҡәләмдәштәре һәм уның ижадын үҙ итеүселәр йыйылды.

Роберт Паль 1938 йылдың 15 апрелендә Ауырғазы районында тыуған. Стәрлетамаҡ һәм Белорет ҡалаларының педагогия училищеларында белем ала. 1961 йылда Башҡорт дәүләт университетын тамамлай. Төрлө йылдарҙа «Китап» нәшриәтендә, «Бельские просторы» журналында хеҙмәт итә. Әйтергә кәрәк, был журналдың барлыҡҡа килеүендә лә уның тос өлөшө бар. Һаҡлы ялға сыҡҡас та, яҙыусы ижад итеүен дауам итә.

Яҙыусылар союзы етәксеһе Риф Тойғон юбилярҙы ҡотлап иң изге теләктәрен еткерҙе, уның эш һөйөүсәнлеген билдәләне. Бөтә сығыш яһаусылар Роберт Васильевичтың һүҙ ҡәҙерен белеүен, талапсан булыуын, шул уҡ ваҡытта кешелекле булыуын һыҙыҡ өҫтөнә алдылар.

Кисә барышында юбиляр үҙенең шиғырҙарын, тәржемәләрен уҡып ишеттерҙе.