Башҡорт телендәге әҙәби-художестволы баҫмаға башҡорт журналисының повестары тупланған. Унда һүҙ арабыҙҙа йөрөүсе замандаштарыбыҙ, уларҙың уй-фекерҙәре, эш-ғәмәлдәре тураһында бара. 

«Йәйге селлә» повесының төп геройы ─ Морат Ҡондоҙбаев. Бик талантлы, ярайһы уҡ популяр журналист. Әммә тура һүҙе һәм журналистиканың төп принциптарына тоғро ҡалыуы арҡаһында эштән китергә мәжбүр. Ғаиләһе лә тарҡала, дуҫтарын да юғалта. Ошондай ҡатмарлы бер мәлдә яҙмыш уға сағыу мөхәббәт бүләк итә... Был ғәмәлдә мөхәббәт тураһындағы әҫәр.

"Бөркөтсө" мажаралы повесы бөгөнгө башҡорт ауылы, башҡорт йәштәренең еңел булмаған яҙмышы тураһында. Бәләкәй генә ауыл янынан аҡҡан йылғаны быуып эргәләге ҡала предприятиелары плотина төҙөй башлай. Был плотина ауылды һыу баҫыу менән янай. Мафиоз ойошмалар ҡатнашҡан был проектты нисек туҡтатырға? Әлбиттә, улар барлыҡ инстанцияларға мөрәжәғәт итеп ҡарайҙар, әммә һөҙөмтәһе булмай. Артабан әҫәрҙә хәл-ваҡиғалар Мәҡсүт исемле егеттең плотинаны шартлатыуы менән дауам итә.

"Бөрйән мажаралары" повесы урман-таулы ошо төбәктә булған төрлө мистик хәлдәр тураһында. Ул еңел тел һәм юмор менән яҙылған, бер сюжет һыҙығына теҙелегән бер нисә хикәйәне үҙ эсенә ала.

Белешмә өсөн: Нияз Алсынбаев - радиожурналист. Яҙыусылар берлеге ағзаһы. Бер нисә китап авторы. Уның геройҙары ғәҙәти тормошта йәшәй һәм ғәҙеллек өсөн көрәшә. Йыйынтыҡҡа ингән башҡа әҫәрҙәрҙә лә һәр кем үҙен таныр.

Баҫманы Зәйнәб Биишева исемендәге "Китап" нәшриәтенең фирма магазиндарынан һатып алырға мөмкин.