22 мартта, Башҡорт дәүләт филармонияһының Ҙур залынада популяр йырсы Айгөл Һағынбаеваның өр-яңы «Ялҡынланып йәшәр йәшлегем» исемле тамашаһы үтәсәк.

Танылған йырсы Айгөл Һағынбаева Башҡортстанда ғына түгел, ә сит тарафтарҙа ла тамашасы һөйөүен тиҙ арала яуланы. Ул тыумышы менән Башҡортостандың Учалы районынан. Ҡазан дәүләт мәҙәниәт академияһында белем ала, шул уҡ ваҡытта бик күп мәҙәни сараларҙа ҡатнашып, йыр-моң һөйөүселәрҙе үҙенең көслө һәм моңло тауышы менән һоҡландыра.

Бөгөнгө көндә Башҡорт дәүләт филармонияһында ижад итеүсе йәш йырсы Айгөл Һағынбаева Өфө тамашасылары өсөн үҙе әҙерләгән айырым концерт программаһы менән сығыш әҙерләй. «Ялҡынланып йәшәр йәшлегем» тамашаһында Айгөл үҙенең репертуарындағы элекке матур йырҙары менән бергә өр-яңы ижад ителгәндәрен дә башҡарасаҡ. Шулай ук был программала Айгөлдөң ижадташ дуҫтары: Искәндәр Ғәзизов, Айгиз Ғизәтуллин, Редик Фәсхетдинов, Миңлеәхмәт Ғәйнетдинов, Азат Айытҡолов, Лилиә Хәзиғәлиева, Диана Мөхәмәтйәрова, Раушания Кәбирова, Әлиә Нурғәлиева, «Далан» төркөмө һәм башҡа эстрадабыҙҙың танылған артистары ҡатнаша.