Яратҡан театрыбыҙҙа премьера!
31 октябрь Мәжит Ғафури исемендәге Башҡорт дәүләт академия драма театры сәхнәһендә Рәлиф Кинйәбәев пьесаһы буйынса "Әбейүшкә@тущка.ru" спектакленең премьераһы үтәсәк.
Заманса комедияла өлкәндәр һәм балалар, тормош, йәшәү ҡәҙере, бер-береңде ихтирам итә белеү кеүек мәңгелек темалар күтәрелә һәм пьеса тамашасыны донъяһын онотоп көлөргә лә, уйланырға ла мәжбүр иткән сәхнәләргә бай булыуы менән ҡыҙыҡлы.
Бибисара әбей улы һәм килене менән ауылда донъя көтә, йәше өлкән булһа ла ҡул ҡаушырып ултырмай: әле картүф утай, әле мунса яға, әле гәзит уҡый... Күпме ғүмер ҡәйнә менән йәшәп килене унан ялҡып та киткән, ә икенсе яҡтан, йорттағы бөтә эште шул әбейүшкә бөтөрөп йөрөй. Улы менән килене, ҡалала йәшәгән ҡыҙы менән кейәүе әсәләрен «һин ҡара», «юҡ, һин ҡара» тип бәхәсләшкәндә, өлгөр замана ҡарсығы үҙ яҙмышын үҙе хәл итеп тә ҡуя. Ә нисек? Быға һис кемдең башы етмәҫ! Тағы ла әбейүшкәгә рәсми хат килеп төшә: «Һеҙгә, хөрмәтле Бибисара Ғүмәр ҡыҙы, һуғыш ветеранының тол ҡатыны булараҡ бер бүлмәле фатир, йә миллион ярым аҡса бүленә», - тиелә унда һәм күҙ күреп ышанмаҫлыҡ көлкөлө лә, уйландырғыс та ғибрәтле хәлдәр башлана.
Спектаклдең режиссеры – Илнур Муллабаев, рәссамы- Альберт Нестеров, музыкаль яҡтан биҙәүсеһе - Илшат Яхин. Ролдәрҙә: Заһир Вәлитов, Рәмзиә Хисамова, Илдар Ғүмәров, Эльвира Юнысова, Айһылыу Йомағолова, Фирүзә Аллаярова, Руслан Ғәлимов, Илсур Байымов, Сәғиҙулла Байегет, Шәүрә Дилмөхәмәтова.
