Ярһыу ғүмер, ярһыу ижад
Октябрь айында билдәле башҡорт яҙыусыһы , БР-ҙың атҡаҙанған сәнғәт эшмәкәре, Салауат Юлаев исемендәге дәүләт премияһы лауреаты Ғәзим Шафиҡовтың тыуына 75 йыл тулды. Ошо айҡанлы Әхмәтзәки Вәлиди исемендәге Милли китапхананың башҡорт әҙәбиәте һәм тыуған яҡты өйрәнеү бүлегендә «Ярһыу ғүмер, ярһыу ижад» тип аталған хәтер кисәһе үтте. Сарала билдәле башҡорт яҙыусылары, әҙиптең туғандары һәм уның ижадын һөйөүселәр йыйылды.
Кисә Башҡортостандың халыҡ артисы Роберт Юлдашев уйнауында ҡурай моңо менән асылды. Был юҡҡа түгел, сөнки Ғәзим Шафиҡов халҡыбыҙҙың милли ҡоралына оло һөйөү йөрөткән шәхес булған.
Башҡортостан Яҙыусылар Союзы рәйесе, драматург Наил Ғәйетбаев Ғәзим Ғәзиз улының шәхесенә үҙ баһаһын биреп китте:
- Беҙ Ғәзиз менән Мәскәүҙә бегә уҡыныҡ. Ныҡ белемле, ғәҙел, тура һүҙле, шул уҡ ваҡытта бик ихлас, йомарт кеше булды, - тине ул.
Башҡортостандың халыҡ шағиры Рауил Бикбаевтың да кисәлә ҡатнашыуы сараға мәртәбә өҫтәне:
- Ғәзим Ҡырғыҙстанда тыуһа ла, башҡорт рухын, башҡорт моңон күңеленә һеңдереп үҫкән кеше. Миңә уның менән БДУ-ла бергә уҡырға тура килде. Ғәзим Шафиҡов башҡорт әҙәбиәтен үҫтереүгә күп көс һалды, халҡыбыҙҙың арҙаҡлы шәхестәре Һәҙиә Дәүләтшина, Дауыт Юлтый, Шәйехзада Бабич, Зәки Вәлиди исемдәрен яңынан халҡына ҡайтарҙы. Әҙипкә бик күп кисерергә тура килде, әммә уның рухы һүнмәне.
Башҡортостандың һәм Рәсәйҙең халыҡ артисткаһы Таңсулпан Бабичева яҙыусының әҫәрҙәре ныҡлап өйрәнелһен ине, тигән теләген белдерҙе.
Ғалимыбыҙ Рәшит Шәкүр Ғәзим Шафиҡов ижадына ҡыҫҡаса байҡау яһаны һәм ҙур баһа бирҙе. Рус телле, башҡорт рухлы ғалимыбыҙ аҫыл һәм алтын мираҫ ҡалдырҙы, тине Рәшит Зәкир улы.
Шағир иҫтәлегенә бик матур һүҙҙәр әйтелде, Рауил Бикбаев, Ирек Кинйәбулатов, Айҙар Хөсәйенов, Лира Яҡшыбаева уға бағышланған шиғырҙарын уҡынылар. Әйткәндәй, һөйөнөслө яңылыҡ та бар – Башҡорт драма театры сәхнәһендә Ғәзим Шафиҡовтың хәтер кисәһен уҙғарыу ҡарала, һәм, шулай уҡ, уның тураһында хәтирәләр йыйынтығы әҙерләнә. Кемдең яҙыусы хаҡында әйтер һүҙе, бүлешер хәтирәһе бар, Ирек Кинйәбулатовҡа мөрәжәғәт итә ала.
Кисә барышынды яҙыусының ижады һәм тормошона бағышланған традицион һәм виртуаль күргәҙмә эшләне.
