Башҡортостан халҡы, республикабыҙ әҙәбиәте ҙур юғалтыу кисерҙе. 83-сө йәшендә, ҡаты ауырыуҙан һуң күренекле яҙыусы, Хәкимйән Зарипов вафат булды. 

Яҙыусы, драматург, юрист, Башҡортостан Республикаһының атҡаҙанған сәнғәт эшмәкәре, М. Аҡмулла исемендәге дәүләт премияһы лауреаты Зарипов Хәкимйән Сәрүәр улы 1929 йылдың 18 октябрендә Миәкә районы Ҡаран-Ҡунҡас ауылында тыуған. Тыуған ауылында ете йыллыҡ мәктәпте тамамлағандан һуң Хәкимйән Сәрүәр улы тыуған колхозында иҫәпләүсе, бухгалтер булып эшләй. Һуңынан Өфө коопретив техникумын, Ҡазан дәүләт университетының юридик факультетын тамамлай. Юғары уҡыу йортон тамамлағандан һуң 1960-1965 йылдарҙа «Совет Башҡортостаны» гәзите редакцияһында корреспондент булып эшләй. Ошо йылдарҙа ул үҙенең беренсе хикәйләрен, повестарын яҙа. Хәкимйән Зариповтың беренсе ҙур күләмле «Фәнисәнең мөхәббәте» исемле повесы 1961 йылда айырым китап булып донъя күрә. Артабан «Яҙмыш эҙҙәре буйлап», «Ғашиҡтарҙы хөкөм итмәйҙәр» һ.б. китаптары донъя күрә. Хәкимйән Зарипов шулай уҡ драматургия өлкәһендә лә уңышлы эшләне. «Эх, кәләше лә кәләше!» комедияһы Мәжит Ғафури исемендәге башҡорт дәүләт академия сәхнәһендә 10 йылдан ашыу уңыш менән бара. 

«Башҡортостандың мәҙәни донъяһы» порталы