Иглин районында «Яҙғы тамсы» йәш таланттар республика конкурсы үтте. Был конкурс йәш быуын вәкилдәре араһында йылдан-йыл билдәлелек яулай. Быйыл ул төрлө йәштәге йөҙҙән ашыу йәш башҡарыусыны йыйҙы. Конкурстың үҙенсәлеге шул: бәйге һәләтле йәштәргә Өфө сәнғәт училищеһына юл аса.
Конкурс эстрада һәм халыҡ йүнәлештәре буйынса барҙы. Баһалама ағзалары йырсыларҙың репертуарын, костюмын, сәхнәлә үҙ-үҙен тотошон һәм микрофон менән ҡуллана белеүен тикшерҙе. Сараға йәш башҡарыусылар ентекле әҙерләнгәйне, шулай ҙа Нуриман районынан Рузиль Камалов башҡаларҙан үҙенең күп яҡлы талант эйәһе булыуы менән айырылып торҙо.
Конкурс еңеүселәре 1 дәрәжә лауреат дипломдары менән бүләкләнде. Улар артабан Дүртөйлө ҡалаһында үтәсәк республика конкурсында ҡатнашасаҡ. «Башҡортостандың мәҙәни донъяһы» порталы