Яҡташыбыҙ – билдәле опера йырсыһы, бөгөнгө көндә Санкт-Петербург ҡалаһының Мариинка театры солисы Илдар Абдразаҡов Италияла үткән «Оскар делла лирика» халыҡ ара опера конкурсында еңеүсе булды.
Был конкурс 2010-сы йылдан ойошторола. Премия доньяла опера сәнғәтен үҫтереүгә тос өлөш индергән башҡарыусыларға тапшырыла. Әйтергә кәрәк, Илдар Абдразаковтың халыҡ-ара кимәлдә был тәүге наградаһы түгел. 2011 йылда ул Америка Ҡушма Штаттарының Лос-Анджелес ҡалаһында йыл һайын уҙғарыла килгән «Грэмми» премияһына лайыҡ булғайны. Илдар Абдразаҡов Өфөлә тыуған. Өфө дәүләт сәнғәт институтын тамамлай (Миләүшә Мортазина класы). Институттан һуң Башҡорт дәүләт опера һәм балет театрына саҡырыла. 1998 йылда Илдар Абдразаҡов беренсе тапҡыр Мариинка театры сәхнәһендә сығыш яһай, «Фигароның туйы»нда Фигаро партияһында, ә 2000 йылда Мариинка труппаһына алына.  «Башҡортостандың мәҙәни донъяһы» порталы