Яңауыл мәҙәниәт йорто сәхнәһендә Радик Гәрәев исемендәге асыҡ конкурстың гала-концерты ҙур уңыш менән үтте. Сарала конкурста еңеүселәр ҡатнашты, улар Өфө сәнғәт училищеһының «Йәшлек» эстрада-симфоник оркестрына ҡушылып Р.Гәрәев репертуарынан йырҙар башҡарҙы. Оркестрҙың художество етәксеһе һәм дирижеры, халыҡ-ара конкурстар лауреаты, «Баш ҡала ҡаҙаныштары» титулын яулаусы Фәнзир Ниғмәтйәнов билдәле йырсы Радик Гәрәев ҡасандыр башҡарған популяр йырҙарҙан программа әҙреләгән.

Был конкурста Гран-при яулаусы сәнғәт училищеһы студенты Айнур Вәлмөхәмәтовтың сығышын тамашасылар яратып ҡабул итте. Ул «Уралым» башҡорт халыҡ йырын башҡарҙы.

Башҡортостандың һәм Рәсәйҙең атҡаҙанған сәнғәт эшмәкәре, республиканың халыҡ артисы, профессор, Башҡортостан дәүләт опера һәм балет театрының баш хормейстеры Эльвира Ғәйфуллина етәкселегендәге жюри конкурста ҡатнашыусыларҙың һәләтен юғары баһаланы. Яңауыл халҡы был музыкаль бәйгегә республика статусын бирергә хыяллана.

Сығанаҡ: «Башинформ»